Vier gebede by jaargetye in die Boland

Hier kan jy die gedig lees, 'n klankopname aanlyn maak, luister na klankopnames wat reeds gemaak is en stem vir die opname van jou keuse.

Mei-Julie 1937

I. Vroegherfs
Die jaar word ryp in goue akkerblare,
in wingerd wat verbruin, en witter lug
wat daglank van die nuwe wind en klare
son deurspoel word; elke blom word vrug,
tot selfs die traagstes; en die eerste blare val
so stilweg in die rook-vaal bos en laan,
dat die takke van die lang populiere al
teen elke ligte môre witter staan.
O Heer, laat hierdie dae heilig word:
laat alles val wat pronk en sieraad was
of enkel jeug, en vér was van die pyn;
laat ryp word, Heer, laat U wind waai, laat stort
my waan, tot al die hoogheid eindelik vas
en nakend uit my teerder jeug verskyn.

II. Uit hierdie ligte herfs
Uit hierdie ligte en wye herfstyd straal
’n nuwe, namelose vreug in my
dat ek verwilderd deur ’n wêreld dwaal
waar dinge daeliks hul vervulling kry:
die vleie staan weer soggens vol, en wit
van waterblomme; en skeemrings wit soos graan
wat die rykheid van veel somerlug besit,
kom oor die geel boorde en stoppellande aan.
Waarom die smart wat nou weer stilweg skryn,
en hierdie preweling van nuwe woorde,
dié gemis? Is alle wording pyn,
en alle bid die tas van ons verstoorde
hart na nuwe name vir die leed
van die wondre uitbloei wat hy in hom weet?

III. Winter
Nou lê die aarde nagtelang en week
in die donker stil genade van die reën,
en skemer huise en takke daeliks bleek
deur die wit mistigheid en suising heen.
Dis alles ryk en rustig van die swaar
geheime wasdom wat sy paaie vind
deur warm aarde na elke skeut en blaar,
en ver en naby alles duister bind
in vog en vrugbaarheid en groot verlange;
tot ons ’n helder middag skielik sien
die gras blink, en die jong graan teen die hange,
en weet dat alle rus die lewe dien:
hoe kon ek dink dat somer ryker is
as hierdie groei se stil geheimenis?

IV. Eerste sneeu
Die blydskap het oornag soos nuwe sneeu
die laagste hellings van my vroeë smart
tot skoonheid omgeskep waar elke skreeu
soos ’n sweep in die blink lig van die klowe hard
en helder klink. Die ronde aarde staan
wit oopgekelk en suiwer soos ’n blom –
een glinstering waar die nuwe waters gaan,
verwagtingloos, want alles het gekom.
O hart, sal vreugde hoër gaan, en jy
nie sterf? Daar kom in my ’n stil vermoede
dat alle lewe só sy volheid kry
en heerlik gaan in die rustige dood se hoede,
dat jy sal spoel en breek en uitgestort
in hierdie wit golf van die vreugde word.

 

So maak jy 'n opname aanlyn:

Get Adobe Flash player

Stappe om 'n klankopname te maak:

  1. Klik "Allow" om die opnemer die nodige toestemming te gee om van jou mikrofoon gebruik te maak.
  2. Klik "Close".
  3. Klik "Record" (blou sirkel) en begin praat.
  4. Klik "Stop" wanneer jou voorlesing van die gedig klaar is.
  5. Luister na die opname as jy wil deur op die "Play"-knoppie te klik.
  6. Indien jy tevrede is met jou opname, klik "Stuur opname".

As jy vantevore 'n klankopname gemaak het, kan jy dit hier kies en oplaai:

Moet asseblief nie die blad toemaak voor die opname klaar opgelaai het nie.

Teken in om opnames te laai!

Registreer

 
Of teken in met Facebook:

Daar is nog geen klankopnames vir hierdie gedig gemaak nie. Hoekom maak jy nie een nie?

 

 

N.P. van Wyk Louw

Deur N.P. van Wyk Louw

Lees meer oor N.P. van Wyk Louw